Tume ya Utumishi wa Mahakama

Na Lydia Churi- Tume ya Utumishi wa Mahakama

Jaji Mkuu wa Tanzania na Mwenyekiti wa Tume ya Utumishi wa Mahakama Mstaafu Mhe. Prof. Ibrahim Hamis Juma amesema ushirikiano kati ya Mhimili wa Mahakama na Mihimili mingine ya Dola hauingilii uhuru wa Mahakama bali unasaidia kuiwezesha kupata rasilimali zinazosaidia katika kuimarisha shughuli za utoaji haki nchini.

Akizungumza leo tarehe 15 Juni, 2025 wakati wa hafla ya kumuapisha Jaji Mkuu wa Tanzania Mhe. George Mcheche Masaju Ikulu ya Chamwino mkoani Dodoma, Jaji Mkuu Mstaafu amesema ushirikiano uliopo kati ya Mahakama na Serikali umekuwa ukitafsiriwa visivyo kuwa ni kuingilia uhuru wa Mahakama jambo ambalo siyo sahihi.

”Uhuru wa Mahakama ni pamoja na kutafuta rasilimali kwa maendeleo ya Mahakama, ushirikiano kati ya Serikali na Mhimili wa Mahakama hauingilii Uhuru wa Mahakama, alisema Prof. Juma.

Aidha, Jaji Mkuu Mstaafu alimshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan pamoja na Hayati Dkt. John Pombe Magufuli kwa kumwamini na kumteua kuwa Jaji Mkuu wa Tanzania wa tisa tangu nchi ipate uhuru na Jaji Mkuu wa saba Mzalendo.

Alisema uwezeshaji wa rasilimali uliofanywa na Serikali kwa Mhimili wa Mahakama ulileta utulivu mkubwa ndani ya Mhimili huo katika kipindi chake cha Uongozi kama Jaji Mkuu wa Tanzania.

Alimshauri Jaji Mkuu aliyeapishwa kuendeleza ushirikiano na Serikali na kusisitiza  kuwa maboresho yote yaliyofanyika ndani ya Mahakama yanatokana na nguvu ya uwezeshaji uliofanywa na Serikali kwa Mhimili huo.

Prof. Juma alimhakikishia Jaji Mkuu ushirikiano, utiifu na unyenyekevu wa hali ya juu kutoka kwa watumishi wa Mahakama ambapo alisema siku zote wamekuwa ni waaminifu kwa viongozi wao na watakaosimama nyuma yake daima.

Rais wa Jamhuri ya Muungano wa Tanzania Mhe. Dkt. Samia Suluhu Hassan, tarehe 13 Juni, 2025 alimteua Jaji wa Mahakama ya Rufani Mhe. George Mcheche Masaju kuwa Jaji Mkuu wa Tanzania, kuchukua nafasi ya Mhe. Prof. Ibrahim Hamis Juma ambaye amestaafu kwa mujibu wa Sheria.